［兄弟鬩牆］
兄弟間相親相愛是值得感恩，但爸媽仍是要致力平衡。像今日，我突然發現，原來我們仍未做得足夠，所以引發了一次兄弟鬩牆事件。
在二哥追著老三親親時，另一邊廂奶奶告訴我今日下午發生了一件事：大哥打老三。奶奶一邊罵大哥：衰仔，一邊說老三當時哭得很可憐向她求救。
當時我還以為誤會，問大哥：你想跟弟弟玩，但唔小心大力左咋？
大哥：唔係，我特登咖！
奶奶：衰仔，弟弟都無刻意搞你阻你玩，你就特登走過來打弟弟！係咪衰呀？
大哥就默不作聲良久。
我感到難以置信，因為大哥從來沒有主動打人的動機，即使有人欺負他，或是二哥跟他爭吵，也未嘗打人或還手，只是「防禦性」動作。打鬥多數是鬧著玩居多，所以我沒想到他會對一個嬰兒動手，還是刻意，像是報復。
但冷靜回想，他的確自老三識爬開始，多次表示討厭他。我想我們又要對話了。
媽：大哥，你好唔鍾意弟弟，係咪？
哥：係，我好唔鍾意他！
媽：你唔係唔鍾意他呢個人，係他成日搞到你玩唔到馬路火車，所以唔鍾意他。
哥：我已經用玩具箱擋住他，但他仍然推開哂箱，搗亂我啲玩具，搞到我少左時間玩火車路軌。因為我怕他會拆爛我啲嘢！又成日因為他訓左覺唔畀我玩得大聲。我好唔想要bb，唔鍾意他。
媽：其實你好想時刻玩玩具，只是有弟弟係度都無得玩，爸爸媽媽又唔幫你，永遠只係要你遷就忍讓弟弟，其實你會唔會嬲嘅係爸爸媽媽，而唔係弟弟？
哥：我鍾意爸爸媽媽，爸爸媽媽成日買玩具畀我，所以我最鍾意爸爸媽媽；係唔鍾意弟弟，好想他消失，嬲到想食兩條辣椒噴火呀！
媽：嘩！你真係好嬲啊！嬲到要食辣椒噴火⋯
爺爺聽到這裡都忍不住插嘴：其實你都嬲爺爺奶奶只係錫弟弟唔錫你呢？
哥：我淨係鍾意爸爸媽媽！
媽：好，明白了！其實你真係可以嬲，可以唔鍾意弟弟。你可以阻止弟弟破壞你嘅玩具，可以唔同他玩，但媽媽希望你唔好傷害弟弟。咁樣媽媽會好傷心好失望。哥哥從來唔會主動打人，呢次令我覺得好驚訝，你能對二哥好，但竟然會打弟弟。我話，如果我唔鍾意哥哥，我又可唔可以打你？
哥搖搖頭。
媽：咪係囉！你唔鍾意畀人打，弟弟一樣唔鍾意畀人打。以後他再破壞你嘅玩具，搗亂你嘅火車路軌，我唔會只係幫弟弟，會阻止他。你亦可以同爸爸媽媽反映對弟弟嘅不滿，好無？
哥：咁我就罰他到3歲先可以同我玩，他再搞砸我嘅嘢就6歲先可以同我玩。
媽：好！他而家都未識同你玩。
到吃晚餐時，大哥又主動跟弟弟玩，可見他不是完全討厭弟弟，只是爭一口氣。我那時便打趣地說：你唔係罰他唔同他玩咩？
大哥當下呆一呆，就避開弟弟，然後喃喃地說：他幾時先三歲？幾時先有某某咁大（一位教會朋友，約兩歲半）？
媽：好快啦！弟弟不知不覺都快一歲啦！
那時候，大哥突然主動要黏著我坐，又不停重複：我鍾意爸爸媽媽！
我想：大哥喜歡我的原因，應該不是經常給他買玩具（其實我不多買玩具吧）⋯⋯不過，回家後，我一定會跟孩子道歉，因為我真的忽略了大哥的感受⋯⋯
Search